പ്രണയ മഴ

മഴയുണ്ട്,
മരമുണ്ട്,

തണലുണ്ട്.

ചെടിയുണ്ട്,
പൂവുണ്ട്,
പൂംപാറ്റയുണ്ട്.

പ്രണയം
പൂമ്പാറ്റയായ്
പാറുന്നുണ്ട്...

തനിച്ചായി

പ്രണയപാതയോരത്ത്

ചേര്‍ന്നുരുമ്മി നില്‍ക്കവേ

പാഞ്ഞടുത്തൊരു

പ്രാന്തിപ്പരുന്ത്

പറന്നകന്നു,

കൊത്തിയെടുത്തെന്
പ്രാണനെ ...

നമ്മള്‍

ഇപ്പോള്‍ ..

നിനക്കറിയുന്നതിലപ്പുറം
നിന്നെ എനിക്കറിയാം.
 ഞാന്‍ അറിയുന്നതിലപ്പുറം
നീ അറിയുന്നില്ലേ എന്നെ?

നിന്റെ കണ്ണിലൂടെ
എന്റെ കാഴ്ചകളും ,
എന്റെ കണ്ണിലൂടെ
നിന്റെ കാഴ്ചകളും
ഒന്നായപ്പോള്‍
നമുക്കിടയില്‍ ഒരു
ശ്വാസദൂരം മാത്രം..

അമ്മമ്മ

നാലാംക്ളാസ് പഠിപ്പുള്ള
അമ്മമ്മയുമിപ്പോള്‍
ഇംഗ്ളീഷേ പറയൂ..

അമ്മമ്മയുടെ നിഘണ്ടുവില്‍
അരുതുകളില്ല;
'നോ'കള്‍ മാത്രം.

ഉള്ളിയും ഉരുളക്കിഴങ്ങുമില്ല,
ഒണിയനും പൊട്ടറ്റോയും പോരേ?

അത്താഴം അടുക്കളയില്‍ നിന്ന്‍
അകന്നിട്ട് കാലമേറെ..
എല്ലാര്‍ക്കുമിപ്പോള്‍ ഡിന്നര്‍ മതി.

മണ്ണിലും മഴയത്തും
പാടത്തും പറമ്പിലും
കളിച്ചു വളര്‍ന്നവര്‍ക്ക്
സ്വന്തം മക്കളെ
മണ്ണ് പുരളാതെ,
മഴ നനയാതെ,
മലയാളം പറയാതെ
വളര്‍ത്താന്‍
അമ്മമ്മമാര്‍ വേണം.

മക്കളെ വളര്‍ത്തി,
മക്കള്‍ തന്‍ മക്കളെ വളര്‍ത്തി
അമ്മമ്മമാര്‍ വളര്‍ന്നോ, തളര്‍ന്നോ?

സ്നേഹമില്ലാത്തവള്‍

അമ്മയുടെ സ്നേഹമോള്‍
കുട്ടികളുടെ സ്നേഹ ടീച്ചര്‍
അനുജന്റെ സ്നേഹചേച്ചി
സ്നേഹശൂന്യയായ്
പരുക്കന്‍ പാളത്തില്‍ 
ചോരപ്പൂക്കളായ്....

കാമുകന്റെ കല്യാണതലേന്ന് 

കൈകൂപ്പി നടന്ന്‍
പാളത്തില്‍ പാഞ്ഞെത്തിയ
തീവണ്ടിയെ വരിച്ചപ്പോള്‍
വിഡ്ഡിയായത് ആര്‍?

വഞ്ചിക്കപ്പെട്ടതിന്റെ
തീച്ചൂടില്‍ നിന്ന്‍
കാരിരുമ്പിന്‍ കരുത്തോടെ
ഉയിര്‍ത്തെഴുന്നേല്‍ക്ക നീ.....

ഒരു മഴയില്‍
ഒലിച്ചില്ലാതാകുന്ന
മണ്ണാങ്കട്ട ..പ്രണയം...

ഡയറി

നീലചട്ടയ്ക്കകത്തെ വെള്ളത്താളുകളില്‍

ചേര്‍ന്നിരുന്ന് പങ്കുവച്ചതൊക്കെയും

മോഷ്ടിയ്ക്കപ്പെട്ടു.

ഇപ്പോള്‍ ഞാന്‍ എന്നെ കുറിക്കുന്നത്

നിന്നിലാണ്..

ചിക്കന്‍ പോക്സ്

പനി പുതച്ച മയക്കത്തില്‍

ആകാശക്കൂട്ടില്‍ നിന്ന്‍

നക്ഷത്രക്കുഞ്ഞുങ്ങള്‍ ഊര്‍ന്നിറങ്ങി.

ചെറിയ വീട്ടിന്‍ വലിയ മുറ്റത്തവര്‍

പിച്ചവച്ചുല്ലസിച്ചു..

ഞാനാദ്യം ഞാനാദ്യം

മത്സരിച്ചോടിയവരെന്‍

മടിത്തട്ടിലമര്‍ന്നു!!

നെറ്റിയില്‍ , കണ്ണില്‍ , കവിളില്‍ ,

മാറില്‍ ഞാനവരെ ചേര്‍ത്തണച്ചു.

നെറ്റിയിലൊന്ന്,കവിളില്‍ രണ്ടു ,

മൂക്കിന്‍മേല്‍ മൂന്ന്‍ .....

താരക്കിടാങ്ങള്‍ പനിപ്പോളകളായ്

ദേഹത്ത് വിരിഞ്ഞു ,വിടര്‍ന്നു..

ജനവാതിലുകളടഞ്ഞു ..

ആര്യവേപ്പിന്‍ ഇല പാകിയ

തഴപ്പായയില്‍ തടവിലായ് ഞാന്‍ .